Instrucziun instrumentala
Sur la Scola da musica Surselva
Mia instrucziun regulara ei situada alla Scola da musica Surselva. Per entscheiver ni turnar a sunar discutein nus tgei purschida e tgei ritmus d’instrucziun che van a prau cun tei.
Trumbettist · Scolast da musica · Dirigent
Mei interessescha buca mo sche ils tuns ein endretgs, mobein tgei che nus raquintein cun els. Vida quei luvrein nus ell’instrucziun, ell’emprova e sin tribuna.
Viver la musica.
Instrucziun & coaching
Per che ti vegnies vinavon el sunar, entschevein nus cun tias experientschas e finamiras. Ensemen luvrein nus vid il tun, la tecnica e l’expressiun musicala.
Register ault & refrestgament
Per sunaders da stuors · en planisaziun
Segirtad el register ault entscheiva per mei cun il giug communabel dalla buccadira, dalla lieunga, dall’aria e dall’imaginaziun dil tun. Planisai ein blocs cumpacts d’instrucziun per il register ault e per turnar a sunar – en coordinaziun cun la scola da musica. Dimensiun ed annunzia ein aunc buca fixadas.
Bandcoaching
Project da pilot cun la scola da musica
Sunar ensemen, tedlar in sin l’auter e vegnir vinavon sco band. Il bandcoaching vegn preparaus cun la Scola da musica Surselva sco project da pilot. Termins e participaziun sclarin nus sur la scola da musica.
Brassbands & registers
Ensemen dar veta alla musica – in di d’emprova duei dar in impuls che porta era suenter vinavon. Perquei discutein nus ordavon ils tocs, vossas finamiras ed il temps a disposiziun.
Direger brassbands
Dis d’emprovas e lavur da project cun brassbands. Cun preparaziun sin vossa litteratura ed ina clara egliada sin il tun, il sunar ensemen e l’expressiun musicala.
Emprovas da register
Per instruments da stuors, independentamein dil stil. Nus luvrein sapientiv vid quei che vies register drova: risposta dil tun, intunaziun, articulaziun ni il sunar ensemen.
Cumposiziun & arranschament
Ord in’idea nescha musica. Jeu cumponel ed arranscheschel sche tema, idea e temps van ensemen. Damondas prendel jeu encunter tenor capacitad. Dimensiun, diever ed honorari fixein nus individualmein.
Musica & mistregn
Igl instrument s’auda vitier: In problem tecnic san ins buca adina sligiar cun exercitar. Ed in niev buchin sligia buca mintga damonda da sunar. Miu luvratori e mia lavur sco scolast secumpleteschan exact en quei punct.
Buchin & coaching egl atelierProfil artistic & projects
Miu viadi musical e mes projects dattan fuorma a mia lavur.
Cuorta biografia
Remo Derungs ei trumbettist, cumponist, dirigent e scolast da musica da Vignogn en Surselva. El scriva era arranschaments. El ei reparatur d’instruments da flad cun scolaziun professiunala e possessur da Remo’s Musikatelier, ch’el ha fundau il 2001 e meina aunc oz. Il 2014 ha el terminau siu studi da trumbetta da jazz alla WIAM.
Sia lavur musicala cumpeglia concerts, registraziuns da studio, cumposiziuns ed arranschaments sco era instrucziun e la lavur cun ensembles. Sco trumbettist da studio ha el collaborau a numerusas producziuns da CD e da studio, denter auter per NoFuture, Mattiu Defuns, Dario Hess, Alexi Nay e Marcus Hobi sco era Benedetto Vigne.
El decuors da sia carriera da brassband ha el sunau denter auter ella Brass Band Sursilvana (Graubünden Brass), ella Brass Band Cazis, ella Stadtmusik Ilanz ed ella Musica giuvenila Lumnezia. Cun differentas formaziuns da brassband eis el daventaus pliras gadas campiun svizzer.
Tier il toc da teater «Der Dorfladen», ina coproducziun cul Theater Chur, ha el giu la direcziun musicala e scret ils arranschaments; Roman Weishaupt ha menau reschia. Per «Convivenza» ha el cumponiu la musica instrumentala dall’ovra sviluppada communablamein cun Flavio Bundi e dirigiu la Musica giuvenila Surselva. Alla spassegiada musicala tras Vrin cun Gion A. Caminada per il giubileum «50 Jahre Wakkerpreis» ha el purtau la responsabladad musicala generala e collaborau sco cumponist e musicist.
«Brass’n’Jazz» cun Clamür ed Ursina Giger ha el iniziau ed organisau communablamein cun Christian Müller e dirigiu ils concerts. La collaboraziun cun Dario Hess cumpeglia sper las registraziuns da studio era «Brass’N’Hess» sco era sis arranschaments e la direcziun musicala al Festival da la Chanzun Rumantscha 2025. Tier «Dai da me cor» ha el ultra da quei collaborau alla cumposiziun. Ensemen cun «Olympic Brass» e «Celtic Brass» fuorman quels projects ina selecziun da sia lavur multifara.
Oz suna el il pli bugen trumbetta e trumba. El dirigia la Societad da musica Vignogn e la Musica giuvenila Surselva ed instruescha alla Scola da musica Surselva.
Viadi musical
Remo Derungs ha entschiet a sunar flauta en l’emprema e secunda classa primara, suenter ei il cornet vegnius vitier. El ha fatg part dalla Musica giuvenila Lumnezia dapi sia fundaziun il 1990; il 1991 ei la Societad da musica Vignogn vegnida vitier. All’entschatta ha el sunau il tierz cornet. Cura ch’el ha astgau midar sin la trumba, ha quei propi svegliau sia passiun per la musica. Era ils scolasts da register ed ils dirigents dalla Jugend Brass Band Graubünden han influenzau el sco buob.
El ha approfundau sia scolaziun musicala cun instrucziun da cornet a Feldkirch il 1994–1995. Il 2014 ha el terminau siu studi da trumbetta da jazz alla WIAM cun la distincziun «sehr gut»; ses scolasts d’instrument ein stai Claudio Bergamin e Bernhard Schoch.
Sco cornettist e trumbettist ha el sunau denter auter ella Brass Band Sursilvana (Graubünden Brass), ella Brass Band Cazis, el Cerchel Musical Surselva, ella Stadtmusik Ilanz ed el Quintett Sezner. Vitier ein la Musikgesellschaft Möriken-Wildegg e la Mountain Swing Big Band vegnidas. En brassbands ha el sunau el decuors dils onns oravontut soprano cornet.
Substituziuns en differentas brassbands sco era entginas formaziuns ad hoc e combos da jazz, oravontut duront siu temps da studi, han amplificau sias experientschas musicalas. Cul temps ei la carezia per la trumbetta vegnida vitier. Oz suna el il pli bugen trumbetta e trumba. Sia fascinaziun pil tun d’ina brassband ei restada – perquei dirigia el brassbands specialmein bugen.
- 2000–2006 dirigent dalla Musica Greina Vrin.
- Dapi 2005 dirigent dalla Societad da musica Vignogn.
- 2006–2008 dirigent dalla Stadtmusik Ilanz.
- Dapi 2006 direcziun da dis d’emprovas tier differentas societads da musica.
- 2013–2022 direcziun dalla Musica giuvenila Lumnezia.
- Dapi 2013 instrucziun alla Scola da musica Surselva.
- Dapi 2022 dirigent dalla Musica giuvenila Surselva.
Lavurs eligidas
2026
Celtic Brass
Project da concert dalla Societad da musica Vignogn cun musica da brass inspirada dalla musica celtica. Direcziun musicala sco era registraziun ed elavuraziun dil video digl entir concert.
2025 / 2018
Festival da la Chanzun Rumantscha & Brass’N’Hess
2025: Sis arranschaments creai aposta per la Musica giuvenila Surselva e Dario Hess al Festival da la Chanzun Rumantscha. Direcziun musicala e collaboraziun alla cumposiziun da «Dai da me cor».
2018: Coniniziativa e direcziun musicala dalla producziun communabla da crossover Brass’N’Hess cun la Societad da musica Vignogn.
2025
Olympic Brass
Concert annual scenic e musical dalla Societad da musica Vignogn. Direcziun musicala; reschia e giug da teater: Angela Collenberg.
2024
Convivenza
Ovra sviluppada communablamein cun Flavio Bundi per la Musica giuvenila Surselva ed in chor ad hoc. Cumposiziun dalla musica instrumentala e direcziun musicala dalla musica giuvenila.
2022
Spassegiada musicala tras Vrin
Responsabladad musicala generala e participaziun alla spassegiada tras il vitg cun Gion A. Caminada per il giubileum «50 Jahre Wakkerpreis». Ina cuorta atgna cumposiziun ha cumpletau ovras existentas; musica, il spazi dil vitg ed architectura ein s’entupai.
2017
Der Dorfladen
Toc da teater en coproducziun cul Theater Chur. Direcziun musicala, arranschaments e participaziun: Remo Derungs. Reschia: Roman Weishaupt.
2012
Brass’n’Jazz
Idea da project sviluppada communablamein cun Christian Müller, cun Musica Vignogn, Clamür ed Ursina Giger. Coniniziativa, conorganisaziun e direcziun musicala. Quater concerts, in disc cumpact sco era producziuns tier RTR Top Pop ed ella televisiun SRF.
PDF per la pressa
Per organisaturs & pressa
Biografia, lavurs eligidas e colliaziuns tier concerts ed exempels da musica en in document.
3 paginas · Romontsch
Scriva a mi.
Per instrucziun, coaching, dis d’emprovas e collaboraziun musicala. Scriva a mi tia damonda. Sche jeu sun vid instruir ni en in’emprova, s’annunziel jeu pli tard.
Sumaseras 70D
7147 Vignogn
Lumnezia, Grischun